1990 онд Монгол улс нь коммунизмын тогтолцооноос ардчилал руу шилжсэнээр чөлөөт зах зээлийн эдийн засгийн ойлголтууд бий болж удаах жилүүдэд  тус орны улс төр, хуулийн талбарт өөрчлөлт шинэчлэл үргэлжилсээр байв. Ийнхүү өөрчлөлт хурдацтай явагдахын хэрээр нийгмийн олон салбаруудад нөлөөлж, улмаар иргэдийн сайн сайхан байдал, эдийн засгийн тогтвортой өсөлт, цаашид байгалийн баялаг ашиглалтаас нэлээд хамааралтай байх тул хариуцлагатай уул уурхайг бий болгох хөгжлийн стратегийг төлөвлөх шаардлагатай болов.
Монгол орон нь хөгжлийг тогтвортой болгоход тулгарч буй бэрхшээлүүдэд цаг алдалгүй засаг захиргаа болон хуулийн хүрээнд зохих өөрчлөлтүүдийг оруулснаар байгаль орчиндоо тулгамдсан асуудлуудыг улс төр эдийн засгийн хүрээнд төдийгүй нийт ард иргэдийн анхааралд хүргэх боломжтой боллоо. Байгаль орчны асуудлын хүрээнд идэвхтэй байр суурь баримтлах болсон хэдий ч хууль, төрийн бодлогын хэрэгжилт сайнгүй хэвээр байна. Өнөөдөр, тус оронд байгаль орчны урт хугацааны төлөвлөгөөг хэрэгжүүлэхэд санхүү, техник (арга ажиллагаа), хүний нөөцийн чадавх дутмаг байгаа бөгөөд улс орны болоод орон нутгийн түвшинд бодлого зохицуулалт сул, засаг захиргааны бүх түвшиндээ ажлын чиг үүрэг тодорхойгүй, хариуцлагагүй, ашиг сонирхлын өрсөлдөөн их, бодлого хэрэгжүүлэх үр дүнгүй тогтолцоотой бөгөөд хариуцлага, ил тод байдал алдагдсан, авилгалд автсан нь хууль дүрэм хэрэгжихэд тушаа болсоор л байна. Тиймээс үнэхээр байгаль орчныг зохих ёсоор нь хамгаалах , улс орны тогтвортой хөгжлийг бодит болгохын тулд эдгээр тушаа болж байгаа асуудлуудад төвлөрч засаг захиргаа, хууль тогтоомж, тэдгээрийн хэрэгжилт, зохицуулалтыг сайжруулах хэрэгтэй байгаа юм.