Ойн аж ахуй

Монгол орны ой мод нийт нутаг дэвсгэрийн ердөө найман хувь буюу 13 мянган га газрыг хамардаг бөгөөд гол төлөв нутгийн хойд болон төв хэсгийн томоохон гурван голын сав газрын дагуу оршдог. Энэхүү ой модтой бүс нутаг нь голын сав газрыг хамгаалах төдийгүй хүн ардын хэрэглээний түлээ мод болон барилга байгууламжийн бэлэн түүхий эд материал болдог. Монгол оронд хамгийн элбэг тохиолдох модны төрөл зүйл нь хар мод, Сибирийн нарс, Шотланд нарс, хус зэрэг болно.

Ой мод нь гурван төрөл зүйлд хуваагддаг бөгөөд дархан цаазат газрын ой нь ойн 48.2 хувийг, хамгаалалттай бүсийн ой 45 хувийг, арилжааны ой 6.8 хувийг эзэлдэг ба мод, модон материал үйлдвэрлэлд  ашиглагддаг. 

Сүүлийн жилүүдэд ойн зохисгүй хэрэглээний улмаас Монгол орны ойн аж ахуйд үлэмж их аюул нүүрлээд байна. Ойн чанар доройтох түүний хамрах хүрээ багасах зэрэг нь хууль бусаар мод бэлтгэх, гал түймэр, бэлчээрийн даацын хэтрүүлэлт, уул уурхайн үйл ажиллагаа, ойн аж ахуйн зохисгүй бодлого, зохицуулалт, ойн тухай хууль тогтоомжийн хангалтгүй хэрэгжилт, хөнөөлт шавьж болон байгаль цаг уурын өөрчлөлт зэргээс үүдэлтэй.

Ойн нөөцийн доройтол нь мөн Монгол орны гол усны экологид асар их сөрөг нөлөө үзүүлдэг. Ой модыг тайрч огтлох нь хөрсөн дэх давсны болон гол, горхины лаг шаврын хэмжээг нэмэгдүүлж усны чанарыг муутгадаг. Мөн түүнчлэн ойн зохисгүй хэрэглээ нь зарим бүс нутгийг үерт өртөмтгий болгодог төдийгүй хөрсний усны түвшинг бууруулах болон хөрсний усыг тогтоон барих чадварыг доройтуулдаг.